January 22, 2022

ГРЦИЈА, СЕПАК, НЕМА ДА БИДЕ ТОЛКУ СТРОГА Во земјата ќе се влегува и со брз тест

Освен со ПЦР тест направен 72 часа пред патувањето, во Грција, од недела ќе може да се влезе и со негативен рапид тест направен 24 часа пред пристигнувањето, објасни алтернативната министерка за здравство на Грција,

Мина Гага на денешната редовна прес-конференција за текот на пандемијата во земјата, додавајќи дека мерката важи за сите над петгодишна возраст, јави дописничката на МИА од Атина.

Гага рече дека мерката ќе се спроведе на сите влезни точки и се однесува на сите што влегуваат во земјата, Грци и странци, вакцинирани или не, над пет годишна возраст, а одлучено е, како алтернатива да постои и опцијата рапид тест за да се избегнат евентуалните проблеми поради затворени лаборатории заради празниците.

Паралелно, го повтори она што претпладнево го објасни портпаролот на грчката Влада, Јанис Иконому, дека станува збор за привремена мерка за периодот околу божиќните и новогодишните празници и за да се спречи ширењето на омикрон.

На денешниот редовен брифинг со новинарите, Иконому истакна дека „оние кои ќе доаѓаат во земјата од странство на било кој начин, или авионски или со возила преку копнените граници, дури и да се вакцинирани ќе треба да имаат ПЦР тест од 72 часа“.

– Тоа е вонредна мерка за празничниот период, со апсолутно конкретна филозофија. Колку што можеме повеќе да контролираме и да забавиме поголемо ширење на омикрон, со цел да добиеме време за зголемување на имунизациската покриеност со бустер дозата. Со оглед на тоа дека овој период ќе има раздвиженост или со наши сограѓани кои ќе се вратат во земјата за празниците или граѓани кои ќе одат во странство и ќе се вратат,

неопходна е мерка што, како што знаете ја спроведуваат и останатите европски земји, а карактерот ќе биде привремен. Во однос на временскиот период не би сакал од сега да се обврзам со точниот датум на траење, но генерално е за овој период околу празниците – рече Иконому одговарајќи на прашањето на дописничката на МИА од Атина.

Со оглед на тоа дека мерката се однесува на сите земји, важи и за туристите од Македонија.

Исклучок постои за оние патници кои во земјите престојувале помалку од 48 часа.

Детали околу конкретната мерка, како што е пракса во Грција, ќе има во министерската одлука што дополнително ќе биде објавен во Службен весник.

Како што вчера објави МИА, мерката ја соопшти Министерството за здравство на Грција и првично беше дека тестот треба да биде 48 часа, додека пак портпаролот на грчката Влада Јанис Иконому, претпладнево објасни дека тестот треба да биде 72 часа пред патувањето, а сега се воведува и можноста за рапид тест.

Во Грција досега се потврдени 14 нови случаи на варијантата омикрон, со што вкупниот број се зголеми на 17 случаи, а најголемиот дел се неколку области на островот Крит, според официјалните податоци од Националната организација за јавно здравје, јави дописничката на МИА од Атина.

Во изминатите 24-часа, во земјата беа регистрирани 4.696 новозаразени, починаа 96 лица, а 692 пациенти се приклучени на апарати на одделите за интензивна нега во грчките болници, од кои 572, односно 82,37 отсто се невакцинирани или делумно вакцинирани